Quand'alle feste venìanu i tùmbari / currìamu lesti nue all'affruntare: / (o cari tìempi, tornati cchiù?)
O cchi allegrizza quandu sentìamu / 'ntra li cavùni nue rintronare: / bràbita brùbiti, bràbita brù!

Due vote l'annu venianu i tùmbari / alle due feste de lu paìse, / (ch'a tantu tiempu nun viju cchiù!)
a San Rafèle ad allu Càrminu; / io tiegnu ancòre le ricchie tise / a cchillu suonu: bràbita brù!

I mìegliu  tùmbari eranu chilli / chi a nue venìanu de Pittarella, / (tumbarinari fini sù llà)
cà mìegliu d'illi, mannaja puru, / chi la sonàvadi la tarantella? / bràbita brùbiti, bràbita brà!

Quand'arrivàvanu dintra l'Addame / l'aggradiscìanu propu li galli, / (chi rispundìanu: chichirichì!)
li piedi a tutti furnicijàvanu / e lla tenìanu una l'abballi / e 'ncuna mamma dicìa ccussì:

" Gioja de màmmata, figliu, 'nun chiàngere / sienti li tùmbari: bràbita brà!
avanti 'a gghiesa suni chi sònanu: / bràbita brùbiti, bràbita brà! "

" Si tu nun chiangi, core de màmmata, / pue ti cce puortu io 'vanzi llà;
o quanti gienti cce su ch'abbàllanu! / bràbita brùbiti, bràbita brà! "

" Stasìra, sienti, cce sù lli frùguli /   e lle carcasse chi fannu: ttrà!
biellu, nun chiàngere, sienti li tùmbari / e lla grancascia: bràbita brà! "

Ed accitàvadi, cumu ppe' 'ncantu / lu quatrariellu, nun chiangia cchiù,
cà chillu suonu potìadi tantu: / bràbita brùbiti, bràbita brù!

A tantu tiempu mo' nun ce vènenu / cchiùdi li tùmbari, su dissusati; / (è llu prugressu chi 'un ci le vo'!...)
moni alle feste vene lla musica e dde li tùmbari se su scordati / tutti i Gambùni, ma io sulu no!

                                                                                                        Michele Pane